之前入隻十仔果陣時已經覺得呢隻 ES55 個外型幾好，起碼唔駛驚好似 ES7 嘅鏡面咁容易花，之但係因為新出嘅關係，個價同 ES7 相差無幾，所以唯有等下個價有無回落先作考慮，終於，前幾日係某零售商果度以六百蚊左右入咗一隻；當然，以咁嘅價位絕對無可能同九仔十仔做對比，故以下嘅都只係小弟普普通通嘅聽感，大家睇過就算好了！
外觀簡評：
因為 ES55 個 Housing 外殼係金屬拉絲嘅關係，而小弟又比較鐘情於金屬嘅感覺，所以呢隻白色 ES55 嘅賣相以小弟嚟講就真係幾鐘意，所以之前得黑色果陣我死都唔買住，不過除咗個金屬外殼之外，就咁望落去其實都幾膠吓。
聲音簡評：
中高音以呢個價位（指建議零售價）嚟講就真係好似有啲貴，人聲比較前，聲場比較細，聽落去個歌手有啲好似坐係您隔離唱咁，可能聽慣十仔咁有啲唔慣；低音方面，因為呢隻同 ES7 一樣用咗 CCAW 音圈嘅關係，感覺非常強勁，不過質感就比唔上隻十仔。
總結：
整體嚟講，ES55 嘅音色始終都係走唔出鐵三角嘅女毒風格，雖然之前係網上睇過有人話呢隻三頻係鐵三角耳機中已經算係比較平均，但我總係覺得呢隻耳機係高中低音上有啲到喉唔到肺嘅感覺…