アイドリング!!!(美女甜甜圈!!!)4期生

自從4期生喺今年4月加入之後,アイドリング!!!(美女甜甜圈!!!)呢個組合就已經有成20人咁多,如果唔係先前有睇開嘅話,真係眼花繚亂到唔知邊個打邊個。

而呢次新加入嘅4期生成員就有成五個咁多,且年紀最大嘅得15歲,其餘兩個14歲同兩個13歲,筆者得知後第一時間想到五個都咁細個,究竟得唔得架?因為アイドリング!!!呢個組合唔似 AKB48 果啲組合咁主要賣點係跳舞唱歌,アイドリング!!!各成員喺節目中嘅不同環節上所展示嘅即時反應及表現係非常重要,如果成員本身資質唔夠就真係會好令觀眾失望。

就喺最初果幾集節目上,即由4月1日開始至4月9日 (#612 至 #615) 果四集上,唔知係咪唔習慣嘅關係,4期生成員都好似唔係咁想出聲講嘢咁,五個當中得 22 號嘅倉田瑠夏同 23 號嘅伊藤祐奈比較多啲嘢講;最好笑喺係 #615 質問3期生成員果集,23 號嘅伊藤係咁窒3期生,再加上主持升野幫手玩之下,搞到3期生果三位成員都好尷尬好無奈,而最搞笑係 22 號嘅倉田竟質問同係 13 歲嘅 21 號橋本識唔識背九九乘法表 (即九九歌或九因歌),剛剛升上中學2年班嘅橋本照計應該識背曬,當主持人升野叫橋本背第七果行嘅時候,橋本竟然背唔曬,重反問倉田識唔識背,點知倉田背背吓要問4期生其他成員點背…

可能4期生各成員重係小朋友嘅關係,喺之後嘅節目上,係玩遊戲嘅環節中就積極好多,尤其是 #625 對3期生玩大相撲果集,20 號大川俾 26 號尾島搞到喊咗出嚟失曬儀態。不過4期生成員始終係剛剛加入,唔可以要求咁高,且看往後表現如何吧!

發表迴響