聽演唱會一流的耳筒 – PRO700LTD

聽演唱會一流的耳筒 - PRO700LTD

如果有用開耳筒聽歌嘅朋友,應該都聽過鐵三角﹝Audio-Technica﹞呢個日本牌子,而呢個牌子可謂令人又愛又恨,好多時同一款耳機嘅評價可以非常極端,喜歡嘅會聽到感動落淚,唔喜歡嘅會破口大駡其音色過份渲染;的確,鐵三角大部份耳機嘅賣點就係喺中高音上,且聲音會染得非常甜美,分分鐘可以令成熟女聲變成嬌嗲少女聲。而就係呢個原因,大部份鐵三角嘅耳機都唔能夠像其他歐美品牌般成為大路產品,但今次筆者所介紹嘅耳機 – PRO700LTD 就似乎有所分別。

首先講講 PRO700LTD 嘅硬性資料:喺鐵三角官方網頁上,PRO700LTD 屬於大型嘅 DJ 監聽用類型,亦是 PRO 系列中使用最大口徑單元嘅耳機,而型號 LTD 就係屬於 PRO700 中喺 2008 年發售嘅其中一款限量版,同期發售的還有一款全白色的 PRO700CWH;但除咗 LTD 版本之外,其他限量版嘅規格都同普通版一樣,就算係最新出果隻金色 PRO700GD 都只係顏色上嘅分別,所以如果唔係著重睇樣嘅話,買普通版會比較經濟。

那麼 LTD 版本同普通版有乜野分別?從規格上睇, LTD 版比普通版在音壓上大了 1dB/mW、高音伸延由 33KHz 提高到 38KHz 及阻抗提高了 2Ω,雖然就咁睇落好似分別唔大,但只要您攞上手一聽,就明白點解 LTD 版要賣貴差不多四百蚊。

筆者前排好興幸咁收咗隻二手 PRO700LTD 返嚟,所以都可以講下啲聽感。因為 PRO700 本身其中一個賣點係低音,所以 PRO700LTD 嘅低音係喺筆者聽過嘅鐵三角耳機中最好,而因為其高音伸延提升咗嘅關係,之前喺普通版度感覺唔到嘅靚高音,喺 LTD 版中終於出現,再加上其比較中性無乜音染嘅特性,相信 PRO700LTD 除咗可以吸引一啲鐘意聽 Band Sound 嘅朋友之外,重會吸引埋聽 Live Music 嘅朋友,而筆者就鐘意攞 PRO700LTD 嚟聽演唱會,效果一流!

發表迴響

你的電子郵件位址並不會被公開。 必要欄位標記為 *

*
*
Website